John 9

Jisas Ndi, Wu Mong Titim Ti Etpa Titim

1Jisas ni, nombuⱡa ila mba kᵾndrᵾm mel, wu ti metᵾng kᵾn, mong titim ti murum. 2Elim nga kitip kᵾni wu ni kᵾⱡ ndi, waldᵾk nᵾk mel, “Ik Mbo Wu ye! Wu ei metᵾng kᵾn, mong titim uⱡ ei, nam nga ⱡawa tila itim nda? Elim nga, muna mam tipam raⱡ nga nda?” nᵾtᵾng.

3Ni kᵾn, Jisas ndi, punt ropa nimba mel, “Wu ei nga mong titim uⱡ ei, elim nga kep, wote mam tipam raⱡ nga kep, ⱡawa tila mon. Mong titim uⱡ ei, Got nga ronduⱡ ei, kongun em ei mel, kᵾneing nimba itim. 4Na tᵾpa mundrum wu ei nga kongun, rᵾnggilmᵾ endamin. Wamp ti ndi, rumbuldi kongun kapⱡa iti natᵾtᵾmba. 5Na ya mᵾi kona ila mor ei kᵾn, mᵾi kona wamp mbᵾ nga rᵾⱡang ei na mor,” nitim.

6Ni kᵾn, Jisas i nimba moⱡpa, ol ropa mᵾi ila mondpa etpa, ui endpa tᵾpa, wu mong titim ni nga mong raⱡ ila kandpa kᵾn, nimba mel, “Nim nu Sailom ila pukᵾn, nim nga kuimp keta ei ⱡumᵾi rui!” nitim. (Sailom mbi ei nga puⱡ ei, ‘Tᵾpa Mundrum.’) Wu ni mba kuimp keta ⱡumᵾi ropa pendpa, yant oⱡnga, mong raⱡ piral nilinga, kona kᵾndrᵾm.

8Ei nga, mang keta kup wamp na, unt rᵾng mawa etpa moⱡnga, kandrung wamp na nimbᵾ ndi, waldᵾk nᵾk mel, “Wu ei moⱡpa, wamp mbᵾ rᵾng mawa etᵾm ni nda?” nᵾtᵾng. 9Wamp mat ndi, “Wu waⱡᵾm ei,” nᵾtᵾng. Wamp mat ndi, “Wu ei mel ti morum ei,” nᵾtᵾng. Wote, mong titim wu ni, elim nimba mel, “Na wu waⱡᵾm ei,” nitim.

10Ni kᵾn, wamp nimbᵾ ndi, waldᵾk nᵾk mel, “Nim nga mong raⱡ etpa, piral nim mel nant?” nᵾtᵾng.

11Wu ni ndi, punt ropa nimba mel, “Wu ti mbi tek, Jisas nᵾtmin ni ndi, ui mat tᵾpa, na nga mong raⱡ ila, kandpa kᵾn na kundpa, nimba mel, ‘Nu Sailo ila pukᵾn, kuimp keta ⱡumᵾi rui nim ila, mbo ⱡumᵾi roⱡmba.’ Na nga mong raⱡ piral nilinga, kona mbᵾ kᵾnt,” nitim.

12Wote, wamp nimbᵾ ndi, wu ni, waldᵾk nᵾk mel, “Wu ei nant ila morum,” nᵾtᵾng. Ni kᵾn, wu ni ndi, punt ropa nimba mel, “Na kᵾni nᵾkᵾnt!” nitim.

Perisi Nimbᵾ Ndi, Mong Etpa Piral Ndurum Uⱡ Ei Andᵾk Kombulk Pᵾtᵾng

13Mong titim wu ni, mek puk, Perisi wu ni kᵾⱡ ngurung. 14Jisas ndi, ui mat tᵾpa, wu ni nga mong rat etpa piral ndurum uⱡ ni, mowi kor mormᵾn ui ila itim. 15Ni kᵾn, Perisi nimbᵾ ndi, aldpa wu ni, waldᵾk nᵾk mel, “Nim nga mong raⱡ etpa, piral nim mel nant?” nᵾtᵾng. Wote, wu ni ndi, nimba mel, “Ui mat tᵾpa, na nga mong ila kandᵾm. Wote, na nga kuimp keta ⱡumᵾi roⱡmba, mong raⱡ piral nim,” nitim.

16Perisi wu mat ndi, nᵾk mel, “Uⱡ i etpa em wamp ei, Got nga wamp ti mon. Nambuⱡ emel, mowi kor nga mi ik ei, tᵾpa roi ndupa em,” nᵾtᵾng. Wote, wu mat ndi, nᵾk mel, “Uⱡ kit etᵾm wu ti ndi, uⱡ rᵾpndi i etpa, mat etmba ei?” nᵾtᵾng. Wote, en enim nga rᵾk ting ila, oi kan mel pendᵾk ik nᵾtᵾng. 17Ni kᵾn, Perisi wu mbᵾ ndi, mong titim wu ni, aldpa waldᵾk nᵾk mel, “Nim nga mong raⱡ etpa piral ndum, wu ei etkᵾn, pᵾn mel nant?” nᵾtᵾng. Ni kᵾn, wu ni ndi, punt ropa nimba mel, “Ei painui wu ti, nᵾmp pᵾnt,” nitim. 18Jura wu nimbᵾ ndi, ko tᵾk, wu ei kupa mong titim ila, wote akup kanim nda? Mam tipam raⱡ pilamin nᵾk, waldᵾk nᵾk mel, “Wu ei enmbil nga kangᵾm ei? Wote metᵾng kᵾn mong titim ninggil ndam, wote akup mong raⱡ piral nilinga, kona kandpa andnim ei etpa, em mel nant?” nᵾtᵾng.

20Wote, tipam mam raⱡ ndi, punt rokᵾⱡ nᵾkᵾⱡ mel, “Wu ei tᵾl nga kangᵾm ei pᵾtmbᵾⱡ. Wote, mong raⱡ titim uⱡ ei, tᵾl pᵾtmbᵾⱡ ku. 21Wote, mong raⱡ piral nilinga kanim, uⱡ ei, nam ndi, etpa piral ndum nda? Elim wu ou ei, waldᵾk pilangina, punt ropa nimba!” nᵾtᵾnggil. 22Mam tipam raⱡ ik i etᵾk, nᵾtᵾnggil ni. Nambuⱡ emel, Jura wu nimbᵾ nga mundmong etᵾnggil. Jura wu mbᵾ nga ik ti unt nᵾk ronduⱡ mundrᵾng. Ei kᵾn, wamp ti ndi, Jisas Got nga ngurum wu ei, nᵾng ndam, manga wingti ila makᵾrpᵾn mundmin nᵾtᵾng. 23Mam tipam raⱡ ndi, ik ei nga pilkᵾⱡ mundmong etkᵾⱡ, nᵾkᵾⱡ mel, ‘Elim wu ronduⱡ ei elim waldᵾk pilᵾi!’ nᵾtᵾnggil.

24Aldpa mong titim wu ni, wi rok tᵾk kundᵾk, nᵾk mel, “Nim Got kᵾn ik kupa ti, nᵾkᵾn mᵾi rui! Nim nga mong etpa piral ndum wu Jisas ei, tᵾn ndi, uⱡ kit etᵾm wu ti, nᵾmp pᵾnmin,” nᵾtᵾng.

25Wote, mong titim wu ni ndi, punt ropa nimba mel, “Wu ei uⱡ kit etᵾm, muna mon nda, na pili napᵾnt. Uⱡ tenda ti, pilip mor ei, na nga mong raⱡ unt titim. Wote akup piral nilinga, kandᵾp mbi ndup mor,” nitim.

26Aldpa Jura wu nimbᵾ ndi, waldᵾk nᵾk mel, “Nim nga nambuⱡ ti endim? Wote nim nga mong raⱡ etpa piral ndum mel nant?” nᵾtᵾng. 27Aldpa mong ti, wu ni ndi, punt ropa nimba mel, “Enim kundᵾp nᵾnt, ik ni pili napᵾlᵾng ei? Aldpa piling pilik nᵾnmᵾn ei? Enim wu ei nga kitip kᵾni wu rᵾⱡing pilik nᵾnmᵾn ei?” nitim.

28Ni kᵾn, Jura wu nimbᵾ ndi, ik mura nguk, nᵾk mel, “Nim mint wu ei nga kitip kᵾni wu ei. Wote, tᵾn Moses nga kitip kᵾni wu kᵾⱡ mormun. 29Got ndi, Moses ik mbo inditim ei, tᵾn pᵾtmᵾn. Wote, int wu ei, kona nant tila moⱡpa urum ei, tᵾn pili napᵾnmᵾn,” nᵾtᵾng.

30Wote, mong titim wu ni ndi, punt ropa nimba mel, “Uⱡ elpa ti mel etpa, na nga mong raⱡ etpa kai endim wu ei moⱡpa, om kona ei, enim ndi pili napᵾnmin ei ka!” nitim. 31Wote Perisi wu nimbᵾ ndi, nimba nᵾk mel, “Tᵾn pᵾtmᵾn ei, Got ndi, uⱡ kit etmin wamp mbᵾ nga ik kum ti natᵾtᵾm. Wamp mat, elim tᵾk ou nduk, elim nga ik teng nduk etmin wamp mbᵾ nga ik kum tetᵾm. 32Unt kor nga, muⱡ mᵾi raⱡ puⱡ mondpa itim ei kᵾn, wamp nam ti ndi, wamp ti, mel nga mong raⱡ kit moⱡnga, wote wamp ti ndi, etpa piral ndurum timan ik ti, pepa yant yant oⱡnga, pili napᵾtmᵾn mon. 33Ya wu ei, Got kᵾn moⱡpa, ui nawᵾⱡnga ndam, uⱡ ti mong ropa iti natilinga,” nitim.

34Jura wu nimbᵾ ndi, punt rok nᵾk mel, “Nim uⱡ kit nga mur ila mondᵾk metᵾng wu ei ndi, wote tᵾn ik mbo endᵾn ei?” nᵾtᵾng. I nᵾk, popᵾⱡ kulk, wu ni, rok pep rorung.

Mondᵾk Pili Napᵾtmin Wamp Mbᵾ, Mong Ti Wamp Mel Kapⱡa

35Jisas ndi, wu makrᵾk mundrᵾng ni nga timan ei pilpa, wu ni, kandpa tᵾpa, nimba mel, “Nim Muⱡᵾl Wu Kupa ei kᵾn, mondkᵾn pᵾn, muna mon nda?” nitim.

36Ni kᵾn, wu ni ndi, punt ropa nimba mel, “Wu Nuim ye! Wamp nam ti, mondᵾp pilimp ei, na kundkᵾn nana pilamp!” nitim.

37Jisas ndi, nimba mel, “Nim ndi, wu ei unt kandrum ni. Wote, akup nim kᵾn ik nimba morum, ei ka!” nitim.

38Wote, mong ti wu ni ndi, nimba mel, “Wu Nuim ye! Na akup nim mondᵾp pᵾnt!” nitim. Nimba Jisas nga kᵾmp puⱡ ila rumaⱡi pepa, elim nga mbi paka rundrum.

39Wote Jisas ndi, nimba mel, “Na mᵾi kona ila mana ur ei, wamp kᵾmp tᵾp mong ti wamp mbᵾ, etᵾp piral ndup, wote mong piral nᵾtᵾm wamp mbᵾ etᵾp, mong ti wamp rundimp pilip ur,” nitim.

40Ni kᵾn, Perisi wu mat, nondpa morung nimbᵾ ndi, ik nitim ni pilik, int nduk waldᵾk nᵾk mel, “Tᵾn mong tᵾtᵾm ku nda?” nᵾtᵾng.

41Wote Jisas ndi, punt ropa nimba mel, “Enim mong tilinga ndam, enim uⱡ kit mat, iti natilingina. Wote, enim nga mong piral nᵾtᵾm nᵾnmᵾn uⱡ ei ndi, ora ndupa, enim uⱡ kit mbᵾ etᵾk, mint mormᵾn,” nitim.